11-майдан 18-майга чейин Түндүк-Түштүк альтернативдик жолунун Арал айылынан Казарман айылына чейинки бөлүгү (195-чакырым – 291-чакырым) унаа кыймылы үчүн жабылат.
Бул тууралуу Транспорт жана коммуникация министрлигинин басма сөз кызматы билдирди.
Жолдун бул тилкесинде сел жүрүү жана таш кулоо коркунучу бар.
Өзгөчө кырдаалдар министрлиги 10-майдан 14-майга чейин туруксуз аба ырайы күтүлөрүн, буга байланыштуу өлкөнүн тоолуу райондорунда сел жүрүшү мүмкүн экенин эскерткен.
Транспорт министрлиги жогоруда айтылган жол тилкесинде селден жана жер көчкүдөн тазалоо иштерин жүргүзөт.