Монголиянын Улан-Батор шаарында өтүп жаткан күрөш боюнча Азия биринчилигинде Алмаз Сманбеков коло медаль тагынды.
57 кг салмактагы Алмаз Сманбеков алгачкы беттешинде кореялык Сангвон Кимди 4:1 эсебинде утуп, жарым финалга өткөн. Экинчи беттеште казак балбаны Рахат Калжанга 6:5 эсебинде жеңишти алдырып жиберген.
Коло медаль үчүн беттеште өзбек балбаны Гуломжон Абдуллаев менен күрөшүп, 13:7 эсебинде жеңип алды.
Муну менен Кыргызстандын байге куржуну 4 алтын, 2 күмүш, 4 коло медаль менен толукталды.
Алмаз Сманбеков ушул жылы Стамбул шаарында өткөн Yasar Dogu, Vehbi Emre & Hamit Kaplan рейтингдик турниринде алтын медаль алган.