Билим берүү жана илим министри Алмазбек Бейшеналиев медициналык жогорку окуу жайлардын ректорлору менен жолугушту.
Жыйында медициналык билим берүүнүн сапатын көтөрүү маселеси талкууланып, бир канча талаптар коюлду:
- Саламаттыкты сактоо министрлиги берүүчү № 6 формага байланышкан талаш маселелерди чечүү чараларын көрүү;
- 3 жылдан 5 жылга чейинки мөөнөттөгү эл аралык программалык аккредитациядан өтүү;
- окутуучулардын 1,75 чен-өлчөмдөн ашпоого тийиш болгон окуу жүктөмү боюнча талаптардын аткарылышын көзөмөлдөө;
- профессордук-окутуучулук курамдын окуу жүктөмү тууралуу маалыматты Билим берүү жана илим министрлигинин жогорку жана орто кесиптик билим берүү башкармалыгына берүү;
- жогорку окуу жайды клиникалык база (көп профилдүү клиника) менен камсыздоо маселесин чечүү;
- алыскы чет өлкөдөн келген студенттердин окуу акысын жылына 3 миң АКШ долларынан кем эмес өлчөмдө бекитүү;
- китепканаларды англис тилиндеги жаңы окуу китептери менен камсыздоо.
Муну менен катар ректорлорго профессордук-окутуучулук курамдын англис тилин төмөнкүдөй деңгээлде билер-билбесин текшерүү, эгер билбесе милдетүү түрдө үйрөтүү талабы коюлду:
- TOEFL IBT – 55 балл;
- TOEFL ITP – 460 балл;
- TOEFL Essentials – 5 балл;
- TOEIC Reading and listening – 550 балл;
- TOEIC Speaking and Writing – 240 балл;
- IELTS – 5.5 балл.
Бул протоколдук тапшырмалар 15-июнга чейин аткарылып, министрликке отчёт берилүүгө тийиш. Эгер андай болбогон учурда медициналык жогорку окуу жайлар жаңы окуу жылына абитуриент кабыл алуу мүмкүнчүлүгүнөн ажыратылат.
Учурда өлкөдө медициналык адистерди даярдоо программасын жүргүзгөн 6 мамлекеттик, 17 жеке менчик (жалпы 23) жогорку окуу жайы бар.
