Бишкек шаарында жол кырсыгы катталып, айдоочу каза тапты. Бул тууралуу Өзгөчө кырдаалдар министрлиги билдирди.
Кырсык бүгүн, 25-мартта таңга маал 7-апрель (Алматы) көчөсү менен Иса Ахунбаев көчөсүнүн кесилишиндеги айлампа жолдо болгон. Mercedes-Benz Sprinter унаасынын айдоочусу рулга ээ боло албай, жолдон чыгып бакты сүзгөн.
Кырсык тууралуу маалымат ӨКМге 7:10до түшүп, жерине 7:17де 5 куткаруучу барган. Тилекке каршы, айдоочу куткаруучулар жеткенге чейин эле каза болуп калган.
Маркумдун сөөгү милиция кызматкерлерине өткөрүлүп берилген. Учурда кырсык боюнча иликтөө жүрүп жатат.