Сауд Арабияда бир катар кылмышка күнөөлүү деп табылган 81 киши массалык түрдө өлүм жазасына тартылды. Бул тууралуу Associated Press жазды.
Сауд өкмөтүнүн маалыматында, өлүм жазасына тартылгандардын айрымдары «Ал-Каида», «ИШИД» террордук уюмдарынын мүчөлөрү жана Йемендеги козголоңчу топторго каржылык көрсөткөндөр.
«Падышачылык терроризм жана бүтүн дүйнөдөгү тынчтыкка кооптуулук жаратуучу экстремисттик уюмдарга карата катуу жана өзгөрүлбөс саясатын улантат», — деп айтылат Сауд Арабия бийлигинин расмий билдирүүсүндө.
81 кишинин өлүм жазасына тартылышы Сауд Арабиянын соңку тарыхындагы эң ири массалык жаза болду. Сауд Арабияда акыркы жолу 2016-жылы 47 адам өлүм жазасына тартылган болчу.