Салык отчётун тапшырбагандардын иши сотко жөнөтүлдү. Бул тууралуу Мамлекеттик салык кызматынын басма сөз кызматы билдирди.
Маалыматка ылайык, 2021-жылдын декабрында жана 2022-жылдын январь-февралында салык отчётторун бербеген ишкерлерди мажбурлап бердирүү үчүн сотко 1 миң 471 доо арыз жөнөтүлгөн. Алардын ичинен 783ү юридикалык жак жана 688 жеке ишкер экени белгилүү болгон. Сот 284 ишти карап чыккан.
Учурда сотко өткөрүп берүү үчүн дагы 5 миң 576 салык төлөөчүгө карата материалдар даярдалып жатат.
Мындан тышкары Салык кызматы патенттин негизинде иш жүргүзгөн жана 3 жылдан ашык патент албаган 9 миң 381 жеке жактын каттоосун жокко чыгарды.
Мамлекеттик салык кызматы отчёт бербеген же патент албагандардын санын кыскартуу иштери уланарын маалымдады.