Мамлекеттик салык кызматынын Сузак райондук башкармалыгынын инспектору Ж.Д.Д. пара алып жаткан жеринен кармалды. Бул тууралуу Улуттук коопсуздук мамлекеттик комитетинин басма сөз кызматы билдирди.
Салык кызматкери Жалал-Абад шаарынын тургунунан патентин жабуу жана кечиктирген карызын оң жагына чечип берүү үчүн акча талап кылган.
23-февралда атайын жүргүзүлгөн операциянын жыйынтыгында Ж.Д.Д. паранын бир бөлүгүн алып жаткан жеринен колго түштү.
Шектүү Жалал-Абад шаардык ички иштер бөлүмүнүн убактылуу кармоочу жайына киргизилди. Тергөө жүрүп жатат.