Парламенттин бүгүнкү жыйынында жазгы талаа жана чарбалык жумуштарды өткөрүүгө карата даярдыктын жүрүшү боюнча Министрлер кабинетинин төрагасы Акылбек Жапаров башында турган тиешелүү мекеме жетекчилери маалымат беришти.
Акылбек Жапаров билдиргендей, азык-түлүк коопсуздугун камсыз кылуу үчүн 9 класстерди ишке киргизүү пландалып жатат. Ага 9 млрд сом даярдалды.
«Өнөктөштөр жана ишкерлер менен чогуу азык-түлүк коопсуздугубузду бекемдейли деп жатабыз. 60 млрд сомдон ашык акчаны импортко жумшап жатабыз. Дээрлик бардык азык-түлүктү чет мамлекеттен алып келип, инфиляцияны күчөтүп жатабыз. Ошондуктан азык-түлүгүбүздү өзүбүз чечпесек, бизге барган сайын кыйын болот. Бензиндин баасын көзөмөлдөй албайбыз. Буудайдын баасын да көзөмөлдөй албасак, нан кымбат боло берет. Азыр президент Садыр Жапаров 5 жылдык стратегиялык планды бекитти. Ага ылайык, биз 9 продукция боюнча коопсуздукту 100% чечишибиз керек», — деди Жапаров.
Эң негизги азык катары нан, эт, сүт, жашылча-жемиш, жумуртка, өсүмдүк майы, кумшекер эсептелет.
Азык-түлүк коопсуздугу 3 негизден турат: физикалык жеткиликтүүлүгү, экономикалык жеткиликтүүлүгү жана азык-түлүктүн сапаты.