Сегиз жыл мурун Кыргызстандан кылмыш жасап, качып жүргөн адам Орусиядан кармалып, Кыргызстанга алып келинди. Бул тууралуу Ички иштер министрлигинин басма сөз кызматы билдирди.
2014-жылы Аламүдүн районунан аёосуз сабалган 1989-жылы жана 1990-жылы туулган эки жигит оор абалда ооруканага түшкөн. Алар топтошкон адамдар сабап кетишкенин милиция кызматкерлерине билдирген.
Аламүдүн райондук ички иштер бөлүмү бул факты боюнча Кылмыш-жаза кодексинин 105-беренеси жана 28-беренеси менен иш козгогон. Ыкчам издөөнүн жүрүшүндө 6 шектүү Кыргызстандын аймагынан, 2 шектүү чет өлкөдөн кармалган. Дагы 1 адам 1993-жылы туулган К.М. качып кетип, табылбай жүргөн.
Сегиз жылга чукул убакыттан бери качып жүргөн шектүү 2021-жылдын жай айында Якутиядан кармалып, 2022-жылдын февраль айында Кыргызстандын күч органдарына өткөрүлүп берилди.