Министрлер кабинетинин төрагасы Акылбек Жапаров Талас облусуна жасаган иш сапарында бир катар ишканаларды кыдырып, эки мектептин пайдубалына капсула салды.
Алгач Кара-Буура районунун Кызыл-Адыр айылындагы «Арашан» сүт заводуна, андан соң Бакай-Ата районунун Ак-Дөбө айылындагы кант заводуна барды.
Андан соң «Ас-Сафа» борбору салып берип жаткан Талас шаарындагы Р. Рысаков атындагы №2 мектептин кошумча имаратынын, Бакай-Ата районунун Өзгөрүш айылындагы орто мектептин имаратынын пайдубалына капсула салды.
Андан тышкары Чоң-Капка капчыгайындагы Киров суу сактагычында болуп, жаңы «Бала-Саруу» гидроэлектростанциясынын курулуш долбоору менен таанышты.
«Бала-Саруу» гидроэлектростанциясын куруу долбоору жалпы кубаттуулугу 25 мегаватт болгон үч генератордон турган, жылына орточо 92 млн кВт/саат электр энергиясын иштеп чыгуучу ГЭСти курууну болжолдойт.
Станцияны курууга Орус-кыргыз өнүктүрүү фонду тарабынан 22,9 млн АКШ доллары бөлүнгөн. Учурда жабдууларды сатып алууга тендер жарыяланган.
