Казакстанда болгон башаламандык фактысы боюнча 5135 адам кармалды. Бул тууралуу Казакстандын Ички иштер министрлиги билдирди.
8-январга карата укук коргоо органы буга чейин 4200дөн ашуун адам кармалганын билдирген. Алардын арасында коңшу мамлекеттин жарандары бар экени такталды. Бирок кайсы өлкөдөн экени азырынча айтыла элек.
Эскерте кетсек, 2-январда Казакстандын батышында суюлтулган газдын кымбатташына байланыштуу нааразылык акциялары башталган. Кийин митингдер өлкөнүн башка аймактарына да жайылган.
Массалык нааразылык акцияларынан улам Казакстандын президенти Касым-Жомарт Токаев өкмөттүн отставкасы тууралуу жарлыкка кол койгон. Ошондой эле Казакстандын Коопсуздук кеңешинин төрагасы алмашып, Нурсултан Назарбаевдин ордуна Касым-Жомарт Токаев келип, өлкө боюнча өзгөчө абал режими жарыяланган.
Кийин Токаев ЖККУга жардам сурап кайрылган. Уюм Казакстанга тынчтык орнотуучу күчтөрдү жиберүү чечимин кабыл алды. 6-январда эртең менен Казакстанда көптөгөн талап-тоноолор жана курмандыктар катталган.