Бишкек-Нарын-Торугарт унаа жолунун Кубакы ашуусунда кырсык болуп, бир адам каза тапты. Бул тууралуу Өзгөчө кырдаалдар министрлигинин басма сөз кызматы билдирди.
Кырсык бүгүн, 23-декабрдын түнүндө саат 2:58де болгон. Skoda Octavia үлгүсүндөгү автоунаанын айдоочусу рулду башкара албай, жолдун жээгиндеги бетон тосмону сүзгөн.
Кырсыктын кесепетинен жүргүнчү каза таап, айдоочу жаракат алган. Унаадагы эки жаран Кочкор районунун Кызыл-Дөбө айылынын тургундары болгон. Бишкек шаарынан айылын карай бара жатышкан.
Жерине Өзгөчө кырдаалдар министрлигинин Кочкор райондук бөлүмүнөн 4 куткаруучу барып, маркумдун сөөгүн «Тез жардам» кызматына өткөрүп беришкен.
