Ош шаарындагы таштанды челектердин жанына видеокөзөмөл камералары орнотулуп баштады. Бул тууралуу шаардын «Тазалык» кызматы билдирди.
Мекеме кабарлагандай, камера таштандыны челекке салбай, анын жака-белине таштап кеткендерди, курулуш калдыктарын төккөндөрдү көзөмөлдөйт. Ар бир келген жарандын кыймыл-аракети видеобайкоого күнү-түнү жазылып турат. Эреже бузгандарга айып пул салынат.
Тазалыкка кайдыгер караган жарандардын кесепетинен шаар булганып, экинчи жактан курулуштун оор калдыктарын жүктөөдөн техникалар бузулуп жатканын айтат «Ош-Тазалык» кызматы.
Видеокөзөмөл камера пилоттук долбоор катары алгач 20 жайга коюлду. Бара-бара бардык жайга орнотулат.
