Сербиянын борбору Белград шаарында өтүп жаткан 23 жашка чейинки балбандар арасындагы эркин күрөш боюнча Дүйнө биринчилигинде Эрназар Акматалиев (70 кг) финалга чыкты.
Акматалиев килем үстүнө бүгүн, 5-ноябрда чыкты. Ал кармашты 1/8 финалдан баштап, биринчи беттешинде грециялык Кристос Кристофоридисти 12:2 эсебинде жеңди. Андан соң чейрек финалда ирандык балбан Алиакбар Алиасгар Фазлыкхалылыны 10:6 эсебинде утуп алды. Жарым финалда Акматалиев азербайжандык Мурад Евлоевди 12:8 эсебинде жеңип, финалга чыкты.
Финалдык беттеште Акматалиев армениялык Вазген Теванян менен күч сынашат. Бул кармаш эртең, 6-ноябрда өтөт.
Эскерте кетсек, буга чейин Эрназар Акматалиев октябрда Норвегиянын Осло шаарында өткөн чоңдор арасындагы Дүйнө чемпионатында күмүш байге тагынган.
Грек-рим, эркин жана кыз-келиндер күрөшү боюнча Дүйнө чемпионаты (U-23) Белград шаарында өтүүдө. 1-ноябрда башталган мелдеш 7-ноябрда жыйынтыкталат.
Бул мелдеште кыргызстандык балбандардын капчыгында бир медаль бар. 4-ноябрда 76 килограмм салмакта күрөшкөн Айпери Медет кызы алтын утуп, дүйнө чемпиону болду. Чемпионаттын биринчи күндөрүндө килем үстүнө чыккан грек-рим балбандары байгелүү орундарга илинген жок.