Электр энергиясын пландык өчүрүүлөр 1-ноябрдан тарта токтотулат. Бул тууралуу Жогорку Кеңештин бүгүнкү жыйынында Энергетика министри Доскул Бекмурзаев билдирди.
Анын айтымында, пландык оңдоо иштери 2 жылдык көлөм бир жылда жасалып жатат.
«1-ноябрга чейин бардык оңдоо иштерин аяктаганга аракет кылып жатабыз. 1-ноябрдан баштап күндүзгү пландык өчүрүүлөрдү токтотобуз. Ошого аракет кылып, балдарыбыз күнү-түнү иштеп жатат» , — деди Бекмурзаев.
Жыйында бир катар депутаттар айылдарда бир нече айдан бери «пландык өчүрүү» деп күн сайын жарык өчүрүлүп жатканын белгилешип, ошол эле учурда өздөрү да күбө болушканын айтышты.