Президент Садыр Жапаров 17-сентябрда «Өзгөн-Мунара-2021» этнофольклордук фестивалына катышат. Бул тууралуу мамлекет башчынын расмий сайты жазды.
Иш-чара кечки саат 20:25те Өзгөн шаарында өтөт. Аны КТРК, республикалык жана облустук телеканалдар түз чагылдырат.
Фестиваль жергиликтүү элдин руханий-адеп-ахлактык жана маданий өсүүсүнө салым кошуу, жер-жерлердеги тарыхый баалуу мурастарды даңазалоо максатында уюштурулган.
Майрамдык салтанатка манасчы, дастанчы, төкмө акындар, фольклордук ансамблдер, искусство чеберлери, сүрөтчүлөр, уз-усталар, кол өнөрчүлөр жана улуттук тамак-аш боюнча ашпоздор катышат.
Анын алкагында азык-түлүк, мөмө-жемиш жарманкеси, кол өнөрчүлөрдүн буюм-тайымдарынын жана сүрөт көргөзмөсү, этномода, күрүч фестивалы болуп, гала-концерт менен коштолот.
Фестиваль Эгемендиктин 30 жылдыгына карата Өзгөн археологиялык-архитектуралык музей-комплекси жана Өзгөн шаарынын аянтында өтөт.