Жогорку Кеңештин депутаты Аида Касымалиева активист Орозайым Нарматованы кармоо уят иш экенин жана бийликтин аброюн болуп көрбөгөндөй түшүрөрүн айтты. Мындай пикирин Касымалиева Фейсбуктагы баракчасына жазды.
«Орозайым — мыкты саясатчы, өзүнүн позициясы бар. Ушундай адамдар саясатта болушу керек жана парламентке келиши керек. Эң негизгиси, анын кармалышы мыйзамсыз жана коюлуп жаткан күнөө суу кечпейт», — деп айтылат билдирүүдө.
«Бүтүн Кыргызстан» партиясы 10-сентябрда Ош шаарында активист Орозайым Нарматованы укук коргоо органдары кармап кеткенин билдирди. Партия Нарматованын кармалышын сөз эркиндигин кысуу, саясий куугунтук катары баалайт.