Президент Садыр Жапаров бүгүн, 27-августта алты күндө Ысык-Көлдү сүзүп өтүп, дүйнөлүк рекорд койгон кыргызстандык суучул Владислав Шуликону телефон аркылуу куттуктады.
Жапаров Владислав Шулико 181 чакырым аралыкты сүзүп өтүп, эрдик жасаганын белгиледи.
«Бардык кыргызстандыктар, анын ичинде мен дагы алты күн бою созулган көлдө сүзүүңүздү сарсанаа болуп карап аттык. Сиз койгон рекорд тууралуу кабарды чоң кубаныч жана толкундануу менен кабыл алдым. Сиз биздин чоң сыймыгыбызсыз. Сизге чейин мындай сүзүүнү эч ким жасаган эмес. Сиздин чеберчилик, өжөрлүк жана Мекениңиз – Кыргызстанды таанытууга болгон эркиңиз коюлган максатка жетүүгө жардам берди», — деди ал.
Эскерте кетсек, Владислав Шулико 22-августта саат 07:30да Караколдон Балыкчы көздөй сүзүп чыгып, бүгүн, 27-августта саат 15:26да батыш жээкке сүзүп келди.