Ооганстандын биринчи вице-президенти Амрулла Салех убактылуу өлкө башчысы экенин билдирди. Бул тууралуу ал өлкөнүн Башмыйзамына таянып, 17-августта Twitterˈге жазды.
«Ооганстандын Конституциясына ылайык, президент жок болгондо, кызматтан кеткенде же каза болгондо вице-президент убактылуу президент болуп калат. Учурда мен өз өлкөмдө болуп, мыйзамдуу президентмин», — деген ал.
Ошондой эле ал башка мамлекеттердин президенттери менен байланышып жатканын айтып, элди «Талибан» кыймылына (Кыргызстан жана башка мамлекеттерде тыюу салынган уюм) каршы турууга чакырган.
Бүгүн, 18-августта Ооганстандын Тажикстандагы элчиси Мохаммад Захир Агбар да учурда өлкөнүн мыйзамдуу президенти Амрулла Салех экенин билдирген.
Белгилей кетсек, 15-августта талибдер Кабулду ээлеген күнү өлкө башчысы Ашраф Гани Ооганстандан чыгып кеткен. Учурда ал кайсы мамлекетте экени боюнча такталган маалымат жок.
15-августта «Талибан» кыймылы Кабулду өз карамагына өткөргөн. Талибдер Ооганстандын бардык аймагын ээлеп алган. Алар «Ислам эмиратын» түзүүнү пландоодо.