Алмаз Мамбетов Ош шаарынын мэри шайланганга чейин мэрдин милдетин аткаруучу болуп дайындалды.
Тийиштүү буйрукка Министрлер кабинетинин төрагасы Улукбек Марипов кол койду.
Алмаз Мамбетов 2016-2019-жылдары Балыкчы шаарынын мэри болуп иштеген. 2019-2020-жылдары Мамлекеттик каттоо кызматынын төрагасы, 2020-жылы президенттин иш башкармалыгынын төрагасы болуп дайындалган.
Ош шаарын 2018-жылдан бери Таалайбек Сарыбашев жетектеп келди. Ал өкмөттүн Ош облусундагы ыйгарым укуктуу өкүлү, 2012-2015-жылдар аралыгында Ош облусунун Алай районунун акими болуп да иштеген.
