Өзбекстан менен Орусиянын өзбек-ооган чек арасында өткөрө турган аскердик машыгууларына Кыргызстандагы орус базасынын аскер учактары катышат. Бул тууралуу Орусиянын Коргоо министрлиги билдирди.
Мурда айтылгандай машыгуулар 30-июлдан 10-августка чейин Сурхан-Дарыя облусунда өтөт. Термез полигонундагы машыгууларга дээрлик 1,5 миң аскер кызматкери, 200дөй аскер техникасы катышат.
Канттагы аскер базадан машыгууларга Су-25СМ учактары жөнөтүлөт.
Белгилей кетсек, мындан мурдараак Орусиянын Борбордук аскер аймагынын колбашчысы Александр Лапин 5-10-август күндөрү Тажикстандын Харб-Майдон полигонунда Орусия, Өзбекстан жана Тажикстандын биргелешкен машыгуулары өтөрүн билдирген.
Аталган машыгуулар Ооганстанда кырдаал курчуп жаткан учурда уюштурулууда.