Токиодогу Олимпиада оюндарынын алгачкы мелдештери башталды. Биринчи оюн софтбол боюнча өттү.
Мелдеш Фукусимадагы «Фукусима Адзума» стадионунда өтүп, анда Япония менен Австралиянын кыз-келиндер курамалары беттешти. Оюнда Япония атаандаштарын 8:1 эсебинде жеңип алды.
Софтбол боюнча мелдеш 21-27-июль күндөрү өтөт. Ага Австралия, Канада, Италия, Мексика, АКШ жана Япониянын кыз-келиндер курамасы катышат.
Софтбол – бейсболдун бир түрү. Буга чейин Олимпиаданын алкагында софтбол боюнча мелдештер төрт жолу 1996-2008-жылдары өткөрүлгөн. Аларда алтын байгени АКШ үч, Япония бир ирет жеңген. 2024-жылы Парижде өтө турган Олимпиада оюндарында софтбол боюнча мелдеш өтпөйт.
Эскерте кетсек, Олимпиада оюндарынын расмий ачылышы 23-июлда болот.