Министрлер кабинетинин төрагасы Улукбек Марипов Ысык-Көл облусунда спорттук машыгуу учурунда 9 жашар баланын сабалышына тийиштүү окуяны көзөмөлгө алды.
Балага зомбулук жасаган жактардын аракеттерине укуктук баа берүү тапшырылды. Ошондой эле толеранттуулук, сабырдуулук жана диний маданият боюнча профилактикалык иш-чараларды өткөрүү маселесине жооптуу болгон Маданият, маалымат, спорт жана жаштар саясаты министрлиги, Билим берүү жана илим министрлигинин да кызматтык жактарынын аракеттерине укуктук баа берилет.
Тогуз жашар бала Ысык-Көл облусундагы дзюдо боюнча секциянын машыгуулары учурунда курдаштары тарабынан сабалган.
Соттук-медициналык экспертизанын жыйынтыгы боюнча жабырлануучунун ден соолугуна жеңил зыян келген.