Футбол боюнча Европа чемпионатынын жарым финалына чыккан биринчи жуп аныкталды.
Чейрек финалдын биринчи оюнунда Швейцария менен Испания беттешти. Эки кураманын оюну узакка созулуп, пенальтиге чейин жетти.
Негизги 90 мүнөттө оюн 1:1 эсебинде тең чыгып, кошумча берилген 30 мүнөттө да эки команданын бири алдыга чыга алган жок. Бирок пенальтиде испаниялыктар атаандаштарын 3:1 эсебинде жеңип чыкты.
Андан кийин Бельгия менен Италиянын курамалары ойноду. Анда Италиянын футболчулары атаандаштарын 2:1 эсебинде утуп алды. Италиялыктарда биринчи голду Николо Барелла, экинчисин Лоренцо Инсинье киргизди. Ал эми Бельгиядан жалгыз голду Ромелу Лукаку киргизди.
Эми жарым финалда Испания менен Италия бири-бири менен ойнойт.
Бүгүн, 3-июлда Бишкек убактысы боюнча саат 22:00дө Чехия менен Даниянын, андан кийин 4-июлга караган түнү саат 01:00дө Украина менен Англиянын оюндары болуп өтөт. Бул эки беттеште жеңүүчү чыккан курамалар жарым финалда бири-бирине каршы ойношот.
Жарым финалдын беттештери 7-июлда башталат.