Велосипедчен адамды сүзүп кеткен Жогорку Кеңештин депутаты Иса Өмүркуловдун 39 жаштагы Азамат Өмүркулов аттуу уулуна карата сотко чейинки өндүрүш токтотулду. Бул туралуу бүгүн, 22-майда Бишкек шаардык ички иштер башкармалыгынын басма сөз кызматы билдирди.
Маалыматка ылайык, соттук-медициналык экспертизанын корутундусуна ылайык, М.Ж. аттуу жарандын ден соолугуна жеңил зыян келтирген жана ал Өмүркуловго эч кандай дооматы жок экендигин жазуу жүзүндө билдирген.
Сотко чейинки өндүрүш Жазык-процесстик кодекстин 26-беренесине (Иш боюнча өндүрүштү жокко чыгаруучу жагдайлар) ылайык токтотулган.
Ага жол эрежелерин бузуу боюнча, Бузуулар жөнүндө кодексинин 123-1-беренесинин 2-бөлүмү, 128-беренесинин 1-бөлүмү жана 122-беренесинин 1-бөлүмү боюнча жалпы суммасы 22,5 миң сом айып пул салынган.
Эскерте кетсек, жол кырсыгы 15-майда саат 22:30дар чамасында Түштүк магистраль менен Токтоналиев көчөсүнүн кесилишинде болгон. Анда «Porsche» унаасын мас абалында башкарган жаран 29 жаштагы велосипедчен кызды сүзүп кеткен. Азамат Өмүркулов 2011-жылкы жол кырсыгына себепкери болуп, анда 3 адам көз жумган.