Индианаполистеги «FedEx» корпорациясынын имаратында бир адам ок чыгарып, анын кесепетинен 8 адам каза болду. Андан сырткары дагы бир нече кызматкер ар кандай жаракат алып, ооруканага жеткирилген.
Полициянын айтуусунда, ок чыгарууга шектүү өзүн-өзү атып өлтүргөн. Акыркы маалыматтарга ылайык, жаракат алгандардын төртөө — өтө оор абалда.
Ок аткандын жана каза болгондордун аты-жөнү, жеке маалыматтары жарыяланган жок.
«Бул окуядан жапа чеккендерге көңүл айтабыз. Компания кызматкерлеринин коопсуздугу алдыңкы приоритет болуп саналат жана биз тергөө органдары менен кызматташууга даярбыз», — деп жазылат «FedExтин» билдирүүсүндө.
«FedEx» ишканасынын имараты «Индианаполис» аэропортунан алыс эмес жерде орун алган.