«Кыргыз темир жолу» мамлекеттик ишканасынын башкы директору Василий Дашков 16-17-мартта Өзбекстандын Ташкент шаарына болгон жумушчу сапарында «Узбекистон темир юллари» ачык акционердик коомунун төрагасы Хуснутдин Хасилов менен жолугушту. Бул тууралуу 24-мартта аталган ишканын расмий сайты жарыялады.
Эки тараптуу кызматташуунун алкагында тараптар «Кытай-Кыргызстан-Өзбекстан» темир жолун куруу долбоорунун жүрүшү жана башка бир катар актуалдуу маселелерди талкуулашты.
Дашков «Кытай-Кыргызстан-Өзбекстан» темир жолун куруу долбоору боюнча түзүлгөн үч тараптуу эксперттик жумушчу топтун негизги максаты бардык тараптардын позицияларын тактоо экендигин белгиледи.
Жолугушуунун жыйынтыгында, ушул жылдын май айынан баштап жумасына 1 жолу, беш айлык мөөнөткө Ташкент-Ысык-Көл-Ташкент багытында жүргүнчү каттам ачуу макулдашылды.