«Жерүй» алтын кенин Орусиянын компаниясы иштетип калышына жеке кызыкчылыктар себеп болду. Бул тууралуу журналист, саясий эксперт Айданбек Акматов «Маралга» берген маегинде билдирди.
Анын айтымында, кенди орус компаниясы иштетип калышы — түшүнүксүз жагдай. Бул жерде мамлекеттик кызыкчылыкка көп маани берилбей калды. «Кыргызалтын» мамлекеттик ишканасынын «Жерүйдү» иштетүүгө толук кудурети жетмек. Бирок түрдүү себептерге байланыштуу «Кыргызалтын» кенди иштетүүдөн четтетилип калган. Бул — сокур кызыкчылык, мамлекеттик саясаттын жоктугунан кабар берет.
Эгерде «Жерүйдү» «Кыргызалтын» иштетсе, мамлекетке эбегейсиз киреше түшмөк. «Кыргызалтын» дүйнөлүк деңгээлдеги компанияга айланмак.
— Орусияга 5 млрд доллардан ашык киреше бере турган кенди карматып коюшту. Биз мында утулдук, «Кумтөр» сыяктуу көрүнүш кайталанды», — дейт Акматов.
Ал белгилегендей, учурда алтынга болгон талап күчтүү. Анткени көп мамлекет резервин алтын менен өлчөйт.