Ош облусунун Өзгөн районунан жасалма АКШ долларын сатууга аракет жасаган жаран кармалды. Бул тууралуу Ички иштер министрлигинин маалымат кызматы билдирди.
Маалым болгондой, ИИМдин криминалдык милиция кызматына Ош жана Жалал-Абад облусунун аймагында белгисиз адам доллар жасап сатуу менен алектенет деген билдирүү түшкөн. Айтылган маалымат Кылмыштардын жана жоруктардын бирдиктүү реестрине катталып, ИИМдин Ош шаардык тергөө башкармалыгы тарабынан Кылмыш-жаза кодексинин 225-беренесинин 2-бөлүмү менен сотко чейинки өндүрүш башталган.
Атайын жүргүзүлгөн операциянын негизинде ИИМдин кызматкерлери Өзгөн районунан жасалма 17 миң 500 жасалма долларды 5 миң накта долларга алмаштырууга аракет кылган ушул эле райондун 1986-жылы туулган тургунун колго түшүрүшкөн.
Факты боюнча тиешелүү экспертизалар дайындалып, учурда кылмышка тиешеси бар башка адамдарды да аныктоо иштери жүрүп жатат.