14-январга караган түнү Ош облусунун Кара-Кулжа районунун Алайкуу өрөөнүндө калың кар жаады. Ой-Тал айыл өкмөтүндө кардын калыңдыгы 1 метрге, Капчыгай айыл өкмөтүнүн аймагында 70-80-сантиметрге жеткен.
Мындан улам, Кара-Кулжа-Алайкуу автоунаа жолу, 42-чакырымдан (Чаар-Арча чеги) 93-чакырымга чейин (Кыргый чеги) жол каттамы убактылуу жабылды. Аны ачуу үчүн Жол тейлөө ишканасынын 6 техникасы иштеп жатат. Аталган жолдо кечки саат 18:00дөн тартып эртең мененки саат 08:00гө чейин чектөө киргизилди.
Өзгөчө кырдаалдар министрлиги кар көчкү түшүү ыктымалы бар кооптуу участкалар Ичке-Суу айылынан (52-чакырымынан) тартып, Ой-Тал айылына (92-чакырымына) чейин экенин эскертет.
ӨКМдин Ош облустук башкармалыгынын Кара-Кулжа райондук Өрткө каршы куткаруу бөлүмү тарабынан райондун борбордук автобекетинде тоолуу аймактарга каттаган такси айдоочуларына, туруксуз аба ырайына байланыштуу, кырсыктардын ыктымалы айтылып, атайын баракчалар таратылды.