Эмгек жана социалдык өнүгүү министрлигинин үй-бүлөлүк зордук-зомбулуктан сактоо жана коргоо бөлүмүнүн башчысы Айкөл Тургунбаева «Маралга» берген маегинде дүйнөдө, өлкөдө үй-бүлөлүк зомбулук күч алып, негизги көйгөйлөргө айланганын билдирди.
Анын айтымында, акыркы он айда Кыргызстанда 7269 үй-бүлөлүк зордук-зомбулук катталган. Бул көрүнүш карантин учурунда 65 %га чейин өскөн.
«Анын негизги себептери, баарыбыз үйдө болуп, аялдардын иштери көбөйдү. Жумушсуздук күч алып, көпчүлүк иштебей калды. Үй-бүлөдөгү атмосфера да чоң таасирин тийгизди», — дейт Тургунбаева.
Ал акыркы он жылдык статистикага токтолду. Алсак 2013-жылы 2700дөй зомбулук катталса, учурда бул сан 700дөн ашты.
«Мурда зомбулукка кабылган жаран милицияга өзү гана кайрылышы зарыл болчу. 2017-жылы тийиштүү мыйзамдарга өзгөртүү киргизилип, жабыр тарткан адам тууралуу бардык жарандар милицияга кайрылууга укук алды. Сандын өсүшүнө бул да таасир этти», — дейт Тургунбаева.
Зомбулуктун психологиялык, социалдык, экономикалык, физикалык түрлөрү бар. Зомбулукка кабылгандардын 80%ын аялдар ээлейт. Булардан тышкары жаш балдар, улгайган адамдар, майыптар да көп кабылат.