Социалдык тармактарда Чункурчак жайлоосундагы 3801 метр бийиктикте жайгашкан Зеленкова чокусунда «Манас» айткан кыргыз жаранынын видеосу тарады. Жунус Маметов социалдык тармактагы баракчасына челлендж кылып, бардык жарандарды #МенМанастынУрпагы хештеги менен «Манас» айтууга чакырды.
«Мен «Манас» эпосун унуттурбоо, улутук идеологиябызды жайылтуу максатында Дөөлөт Сыдыковду колдоп, укмуштуудай жаратылышыбыз көрүнүп турган бийик чокуга чыгып «Манастан» үзүндү айттым. Бул челлендждге баарыңыздарды #МенМанастынУрпагы хештеги менен «Манас» айтууңуздарды чакырам», — деп жазган Жунус Маметов.
Эске салсак, 12-ноябрда манасчы Дөөлөт Сыдыков борбордук «Ала-Тоо» аянтында Гиннестин китебине катталуу жана элди биримдикке чакыруу максатында 14 саат 27 мүнөт тынбай «Манас айтып, рекорд жараткан.