Кыргызстандык спортчулар өспүрүмдөр арасындагы Самбо боюнча дүйнө чемпионатында 1 күмүш, 1 коло медалга ээ болушту.
Турнир Сербиянын Нови-Сад шаарында 5-ноябрда башталган, мелдештин биринчи күнүндө, өспүрүмдөр арасындагы мелдеште 10 медалдар топтому ойнотулду. Кыргызстандан 3 спортчу килемге чыкты.
68 килограмм салмак ченинде жалпы 8 спортчу таймашты. Бул салмак боюнча Кыргызстандан барган Феликс Уланбеков чейрек финалдык этаптан баштап, эки жеңишке жетип, финалда орусиялык Иван Агофоновго утулуп, күмүш медаль тагынды.
57 килограммга чейинки салмак ченинде жалпы 6 спортчу күч сынашып, кыргызстандык Жусуп Шакиров 3-орунду ээлеп, коло медалга ээ болду.
Ахуналы Бейшеналы уулу 82 килограммга чейинки салмак категориясында күч сынашып, бирок медалсыз калды.