Улуттук коопсуздук боюнча мамлекеттик комитетинин жетекчилигине жаңы дайындалган Камчыбек Ташиев маалымат жыйын өткөрдү. Ал анда алдыда жасала турган иштер боюнча оюн билдирип, УКМКны реформа кылууну көздөп жатканын айтты.
— Мен УКМКда ушуга чейин иштебегеним жакшы болуп жатат. Буга чейин министр болуп иштегем, аскердик генерал-майор деген чиним бар. Мекеменин иштерине реформа жасап, УКМКнын күчүн саясий куугунтуктоолорго эмес, коомубуздун, мамлекетибиздин жыргалчылыгы үчүн бурганга мүмкүнчүлүк түзүлдү, — деди Ташиев.
Ошондой эле реформаны ишке ашырууда комитет кызматкерлеринин колдоосу маанилүү экенин кошумчалап, баш-оту менен бул кызматка киришерин белгиледи.
4-октябрда өткөн парламенттик шайлоодо «Мекенчил» партиясын баштап барган Камчыбек Ташиев кызматын мыйзамга ылайык аткарып, партияга мүчөлүгүн токтото турарын айтат.