Бишкектеги «Ысык-Көл» мейманканасынын алдына чогулгандар Жогорку Кеңештин төрагасы Канатбек Исаевдин кетишин талап кылышууда. Алар буга чейин Сооронбай Жээнбековду кызматтан кетүүгө үндөп жатышкан.
Бүгүн митингчилер алгач «Ала-Арча» мамлекеттик резиденциясынын айланасына топтолгон эле. Андан кийин «Ысык-Көл» мейманканасынын алдына барышкан.
Ал ортодо саясатчы Камчыбек Ташиев президент жана премьер-министр активдүү сүйлөшүүлөрдү жүргүзүп жатканын, Жээнбековдун отставкага кетүү маселеси жакында чечилерин Фейсбуктагы баракчасына жазды. Андан көп өтпөй президент Сооронбай Жээнбеков кызматтан кеткенин жарыялады.
«Ысык-Көл» мейманканасынын алдына чогулгандар «Биздин президент Садыр Жапаров», «Исаев кетсин!», «120 депутаттын бизге кереги жок» деген плакаттарды илип алышкан.
14-октябрда Садыр Жапаров өкмөт башчылыкка дайындалган.