Ички иштер министринин мурдагы орун басары Курсан Асанов эки айга камакка алынды. Ал 10-декабрга чейин УКМКнын тергөө абагында болот.
Биринчи май райондук сотунун маалыматы боюнча, Курсан Асанов 9-октябрда Бишкекте болуп өткөн башаламандыкты иликтөөнүн алкагында козголгон кылмыш ишинин негизинде кармалган.
Курсан Асанов 6-октябрдан тартып Бишкек шаарынын коменданты жана Ички иштер министринин милдетин убактылуу аткаруучу болгон. Кийин министрлик аны менен иштешүүдөн баш тарткан.
10-октябрда Улуттук коопсуздук боюнча мамлекеттик комитети жана ИИМдин кызматкерлери тарабынан кармалган.
Учурда «Ала-Тоо» аянтында болуп өткөн массалык башаламандыкка байланыштуу кылмыш ишинин алкагында тергөө иштери жүрүп жатат жана бул ишке тиешеси бар башка адамдарды издөө иштери уланууда.