Нарын облусунун Жумгал районунда болгон жер көчкүгө байланыштуу Бишкек шаарындагы Жылуулук-электр борборуна көмүр ташып келүү белгиленген мөөнөтүнөн кечикти. Учурда ЖЭБге жергиликтүү отун жеткирүү жумуштары башталды. Бул тууралуу өкмөттүн маалымат кызматы билдирди.
Бүгүн, 8-октябрда өкмөткө караштуу тармактык органдар кышка даярдык көрүү маселесин талкуулашты. Отурумда саламаттыкты сактоо жана билим берүү мекемелеринин кышка даярдыгы 74-76 %ды түзөрү айтылды.
Ал эми өлкө аймактарында отун базалары даярдалды. Аймактарга көмүр жеткирүү иштери бекитилген тартипте жүргүзүлүп жатат.
Жыйында көмүрдүн баасын негизсиз жогорулатпоо, ага көзөмөл кылуу тапшырмасы берилди.