Өзбекстандын жемкордукка каршы агенттиги Сардоба дамбасынын жарылышына байланыштуу козголгон кылмыш иши боюнча дагы 8 адамды айыптуу деп тапты. Буга чейин 9 адам күнөөлүү деп табылып, соттолгон болчу. Муну менен жалпы айыпталып жаткандардын саны 17ге жетти.
— Иликтөөнү жогорку квалификациялуу адистерден турган атайын комиссия жүргүзүүдө. Күнөөлүүлөр толук аныкталган соң, жоготууларды кайтарып берүү аракеттери көрүлөт, — деди агенттиктин маалымат кызматы.
Эске салсак, ушул жылдын 1-майында Өзбекстандагы Сардоба суу сактагычы жарылып, аймактагы айылдарды суу каптаган. Кырсыктын кесепетинен 6 адам каза болуп, 70 миңдей тургун коопсуз жайга көчүрүлгөн. Суу ташкын чектеш Казакстандын Түркстан аймагындагы 10 айылды кошо жабыркаткан.