Өзбекстанда Экономикалык өнүгүү жана жакырчылыкты кыскартуу министрлигинин Божомолдоо жана макроэкономикалык изилдөөлөр институтунун базасында «Жакырчылыкты кыскартуу жана калктын жыргалчылыгын изилдөө» илимий борбору түзүлөт.
Борбордун түзүлүшү 2020-2021-жылдарга Өзбекстанда экономикалык өсүштү калыбына келтирүү жана структуралык өзгөрүүлөрдү улантуу боюнча практикалык иш-чаралар планында белгиленди.
Документте белгиленгендей, илимий борбор 2020-жылдын октябрь айына чейин түзүлөт. Борборду мамлекеттик бюджеттен каржылоо пландалууда.
Борбор жакырчылыкты кыскартуу боюнча илимий, усулдук жана изилдөө иштеринин базасын өркүндөтүп, райондук жана шаардык деңгээлде сунуштарды иштеп чыгат.
Иш-чаралар планына ылайык, үймө-үй кыдырып, сурамжылоонун жыйынтыгында 583 миң жакыр үй-бүлө каржылык жардамга муктаж экендиги аныкталды.
«Жакырчылыкты жоюу жана бул үй-бүлөлөрдү жумуш менен камсыз кылуу боюнча даректүү иш-чараларды иштеп чыгуу жана жүзөгө ашыруу башталды» деп айтылат иш-аракеттердин планында.