Бишкекке Беларусиянын Минск шаарынан премьер-министр Кубатбек Бороновдун учагы менен 5,4 тонна дары-дармек жеткирилген. Бул дары каражаттарынын чоо-жайы тууралуу «Марал» радиосунун угармандары, сайттын окурмандары маалымат сурап кайрылышкан.
Өкмөт аппаратынын маалымат кызматы билдиргендей, Беларусиядан алып келинген 5,4 тонна болгон дары-каражаттары кыргызстандык фармкомпанияларга тийиштүү. Өкмөт аны бекер жеткирип берүү жагынан колдогон. Аны таратуу же сатууда кандайдыр бир шарт койгон эмес.
Кубатбек Боронов 17-июлда Минск шаарына барган. Ал Евразия экономикалык биримдигинин Өкмөттөр аралык кеңешинин жыйынына катышкан.
Боронов Беларусиянын президенти Александр Лукашенко менен да жолугушуп, эки мамлекеттин кызматташуусу, соода-экономикалык алака, товар жүгүртүүнү көбөйтүү, эки өлкөнүн кызыкчылыгындагы долбоорлорду талкуулашкан.
Ошондой эле атайын каттам менен коронавирус инфекциясына каршы күрөшүү үчүн керектүү дары каражаттарынан турган жүк келгени айтылган.