Назарбаев университетинин жогорку билим берүү мектебинин профессору Дүйшөн Шаматов «Марал» радиосуна берген маегинде окуучуларды сабакка кызыктырып, шыктандыруу үчүн мугалимдердин чеберчилигин арттыруу керектигин билдирди.
Анын айтымында, ата-эне баласы окууга жакшы катышпай жатканын сабактар онлайн түргө өткөндө гана байкады. Бул пандемияда эле жаралган меселе эмес.
-Көпчүлүк ата-эне мурда баласы меткепте сабактарга кандай катышканын билбей жүргөн. Эми байкап, тынчсызданууда. Бул онлайн окутуунун жакшы себептеринин бири. Мындан сырткары, онлайн окутууда мугалимдер өз ара тажрыйбасы менен бөлүштү, бул — артыкчылык. Пандемияда аз да болсо мугалимдердин кадыр-баркы жогорулады, — дейт Шаматов.
Ал мугалимдер окуучуларды дистанттык баалоонун жаңы ыкмаларын пайдалынышы керектигин айтат.
-Бизге критерийлердин негизинде баалоо керек. Жалаң жаттоо, түшүнүү менен чектелбестен, анализдеп, талдоого, ойлоп табуучулукка үйрөтүү зарыл. Баалоо да ошого жараша болушу зарыл. Текстти курулай жаттап келген балага 5 коюу — эски эреже. Окуганын өздөштүрүп, жаңы билимди пайда кылган балдарга 5 коюп, бул багытта көп иш алып барышыбыз керек. Буга кошумча, китептерди окуп бүтүрүп коюу менен окуу процесси жыйынтыкталбайт. Биз кээде окуу китебинин кулу болуп калабыз. Бул туура эмес, — деп эсептейт Шаматов.