«Ойлонбойлубу!? Келгиле, биринчи бала бакча, мектеп, оорукана салалы»

Бүгүнкү кырдаал эртең мындан да опурталдуу, чоң чакырык болушу ыктымал. Бул тууралуу Биринчи май районунун акиминин орун басары Мавлян Аскарбеков «Марал» радиосуна берген маегинде билдирди.

Анын айтымында, пандемия өлкө экономикасына чоң залакасын тийгизди. Аны кайра калыбына келтирүү бир топ убакытты алат.

Жүз, миңдеген адам жашаган айылда бала бакча, бейтапкана, мектеп жок. Бирок ири тойкана, экиден мечит бар. Ишкерлер соода борборун, тойканаларды курууну токтотуп, бейтапкана салышы зарыл.

«Ошол соода борборлору, базарлар, мечиттер бүгүн адамдын өмүрүн сактап калып жатабы? Жок. Бул ачуу чындык. Бирөөнүн атасы, бирөөнүн баласы көз жумуп жатса, ойлонбойлубу!? Келгиле, биринчи бала бакча, мектеп, оорукана салалы. Эң керектүү нерселерди салып алалы. Ошондуктан мамлекет «тойкананы токтоткула, ишкерлер, акчаңар барбы, бул жерди алгыла» деп супер заманбап бейтапканаларды салдырса… Маселенин баары уюштурууда болуп жатат», — дейт Аскарбеков.