Боливиянын прокуратурасы экс-президент Эво Моралести терроризм боюнча айыптап, камакка алуу чечимин чыгарды. Бул тууралуу прокуратуранын басма сөз кызматы билдирди.
-«Аудио жазуу иши» боюнча иш алып барган прокурорлор комиссиясы мурдагы президент Эво Моралести терроризм жана терроризмди каржылоо боюнча айыптоону чечишти,— деп айтылат документте.
Соттун айыптоосунда, Моралес кызматтан кеткенден кийин «2019-жылдын ноябрь айындагы кагылышууларда шаарлардын азык-түлүк курчоосун уюштурган» деп айыпталган. Чечимде аны убактылуу камакка алуу дагы талап кылынары айтылат.
Өз кезегинде экс-президент прокурордун чечимин мыйзамсыз жана саясий куугунтук катары баалады.
Ла-Пас прокуратурасы мени Конституцияны бузуу менен мыйзамсыз редакцияланган аудио жазуунун жардамы менен терроризмге айыптап жатат. Бийлик тарабынан системалуу саясий куугунтуктун дагы бир фактысы, — деп жазды экс-президент Твиттерде.
Өткөн жылдын ноябрында өлкөнүн Ички иштер министри Артуро Мурило өкмөт Моралес өзүнүн жактоочуларынын бири менен болгон сүйлөшүүсүн аудио жаздырып алганын жарыялаган.
Анда мурунку мамлекет башчысы Ла-Пасты курчап туруу боюнча кеңеш берген. Ички иштер министрлигинин башчысы мурунку президенттин мындай аракеттерин терроризмге жана адамзатка каршы жасалган кылмыш катары баалады.
Ал ортодо Моралес шаарларды азык-түлүк эмбаргосун киргизүүгө үндөгөн эместигин айтууда.
Прокурорлордун айтымында, колумбиялык адистердин анализи аудиожазуудагы үн Моралеске таандык экендигин көрсөттү.