Президенттин аппаратынын дагы 9 кызматкеринен коронавирус инфекциясы тастыкталды. Бул тууралуу президенттин аппаратынын маалыматтык саясат бөлүмүнөн билдиришти.
Жакында эле Кыргыз Республикасынын президентинин аппаратынын 8 кызматкеринен коронавирус инфекциясы аныкталгандан кийин, бардык кызматкерлер илдетке карата анализ тапшырышты.
Алардын жыйынтыгы боюнча дагы 9 кызматкерден, анын ичинде аппарат жетекчиси Досалы Эсеналиевде да коронавирус инфекциясы бар экени тастыкталды. Бүгүнкү күндө президенттик аппараттын илдетке чалдыккан кызматкерлеринин жалпы саны 17 болду.
Алардын баары үй шартында обочолонуп, медиктердин кеп-кеңештерин алып жатышат жана алыстатылган тартипте иштерин улантышууда. Оорунун белгилери ар кимде ар түрдүү өтүүдө, абалдары канааттандырарлык.
Белгилей кетсек, 24-июнда президенттик аппараттын кызматкерлери коронавируска кабылганы аныкталган. Москвадагы Улуу Жеңиштин 75 жылдыгына арналган парадга катышуу үчүн президентти коштоп барган делегациянын ичинен 2 адамдан коронавирус табылып, президент парадга катышпоону чечкен.