Жогорку Кеңештин мурунку депутаты Алмазбек Баатырбеков биринчи вице-премьер министрлик кызматка сунушталды. Бул тууралуу өкмөт башчылык кызматка талапкерлиги көрсөтүлгөн Кубатбек Боронов парламенттеги көпчүлүк коалициянын жыйынында айтты.
Алмазбек Баатырбеков “Кыргызстан” фракциясынын лидери болчу. Ал 9-июнда мандатын тапшырган.
Бүгүн, 16-июнда Жогорку Кеңештеги көпчүлүк коалиция аткаруу бийлигинин башчылыгына Кубатбек Бороновдун талапкерлигин көрсөттү. Өкмөттүн буга чейинки башчысы Мухаммедкалый Абылгазиев өз арызынын негизинде отставкага кетти.