Учурда мобилдик топтор түзүлүп, эл жашаган 114 аймакта коронавирусту жуктуруп алуу коркунучу бар экендиги аныкталып чыкты. Бул тууралуу биринчи вице-премьер-министр Кубатбек Боронов бүгүнкү брифингде билдирди.
Анын айтымында, ошол жерлерде жашаган калктын баарын эпидемиологдор, тиешелүү медициналык кызматкерлер жана башка кызматтын өкүлдөрү менен чогулуп, сурамжылоо жолу менен, керектүү учурда экспресс-тесттер менен анализдерин алып, анын жыйынтыгына жараша андан аркы иштерди жүргүзүп жатышат.
— Кээ бир айматарда жарандарыбыз, өзү билбей, кимден жуктурганын билбей калган учурлар катталып жатат. Ошого байланыштуу Коопсуздук кеңештин жыйынында, Ресапубликалык штаб, өлкөнүн кооптуу деген жерлеринде өзгөчө абал режимин узартып турууну сунуштады, — деди биринчи вице-премьер-министр Боронов.
Республика боюнча жалпы коронавирус жуктургандардын саны 729ге жетти. 437 адам оорудан айыгып, 8 киши коронавирустан улам каза болду.