Кыргызстанда коронавирус пандемиясына байланыштуу аскерге чакыруу убактылуу токтотулду. Бул тууралуу өлкөнүн Куралдуу күчтөрүнүн Генералдык штабынын башчысы Райымбек Дүйшөмбиев “Кабар” агенттигинде өткөн маалымат жыйында билдирди.
— Биз Куралдуу күчтөрдүн катарына аскерге чакыруу, жазгы аскерге чакырууну убактылуу токтоттук. Мобилизация азырынча жарыялана элек, — деди Генералдык штаб башчысы Райымбек Дүйшөмбиев.
Кыргызстанда соңку маалыматтар боюнча коронавирус илдетин жуктуруп алгандардын саны 42ге жетти.
Президент эртең, 25-марттан тарта Бишкек шаарында жана Ош, Жалал-Абад облустарынын бир катар райондорунда өзгөчө абал киргизүү чечимин кабыл алды.