Коронавирустун жайылышына жол бербөө максатында киргизилген чектөөгө байланыштуу ата мекендик экономика жоготууга учурайт. Бирок биз үчүн калктын ден соолугу маанилүү. Бул тууралуу премьер-министр Мухаммедкалый Абылгазиев коронавирус инфекциясынын тийгизген таасиринин кесепеттерин азайтууга багытталган эки Республикалык штабдын ишин талкуулаган кеңешмеде билдирди.
— Биз коронавирус инфекциясынын Кыргызстанга жайылышына жол бербөө боюнча зарыл чараларды кабыл алдык. Эки республикалык штаб түзүлдү. Өлкөнүн көзөмөл-өткөрүү жайларында текшерүү күчөтүлгөн тартипте жүргүзүлүүдө. Эпидемиологиялык жагдайы кооптуу болгон өлкөлөрдөн келген бардык жарандар 14 күндүк карантинге жаткырылууда, — деди Абылгазиев.
Өкмөт башчы түзүлгөн кырдаалга байланыштуу бизнести өнүктүрүүгө көңүл буруу зарылдыгын баса белгиледи.
— Азыр сырьёнун запасы бар, бирок ташуулар качан жана кандай жол менен калыбына келери белгисиз. Мында биздин кемчилдиктерди аныктоого гана эмес, өз өндүрүшүбүздү башынан баштоого аракет кылуу мүмкүндүгү пайда болду, — деди премьер-министр.
Премьер-министр министрликтердин жана ведомстволордун кызматкерлеринин инфекцияны жуктуруу тобокелдиги бар чет өлкөлөргө болуучу бардык иш сапарларын токтотууну тапшырды. Чет мамлекеттерге сапарлар мамлекеттин маанилүү иш-чаралары боюнча гана жана эпидемиологиялык кырдаал дурус өлкөлөргө гана жасалууга тийиш.