Кытайдын Цюаньчжоу шаарында урап түшкөн мейманканада куткаруу иштери аяктады. Куткаруучулар уранды астынан 71 адамды алып чыгышкан. Алардын 29у көз жумган. Бул тууралуу эл аралык басылмалар жазды.
Эске салсак, 7-мартта Фуцзянь провинциясынын Цюаньчжоу шаарында карантинге алынган мейманкана урап түшкөн. Мейманкана коронавируска кабылгандар менен мамиледе болгон адамдарды карантинге алуу жана көзөмөлдөө үчүн пайдаланууга берилген.
5 кабаттуу мейманканада кырсык катталганга чейин 71 адам болсо, алардын 58и вирусту жуктурууга шектелип, карантинге алынган.
Синьхуа агенттигинин маалыматына таянсак, үстүбүздөгү жылдын январь айында мейманкананын биринчи кабатында оңдоп-түзөө иштери жүргөн. Ал эми мейманкана 2018-жылы курулуп, кардарлар үчүн 80 бөлмөсү бар эле.
