28-январдан 1-февралга чейин Кытайдан Кыргызстанга жалпысынан 196 адам келди. Алардын ичинен 182си Кыргызстандын , он үчү Кытайдын , башка өлкөлөрдүн бир жараны бар. Бул тууралуу Саламаттык сактоо министрлиги билдирди.
Маалыматка ылайык, алардын баары тепловизор аркылуу медициналык көзөмөлдөн өткөрүлдү. Вируска байланыштуу шек саналгандар аныкталган жок.
Учурда Сокулуктагы ооруканада — 3, Беш-Күңгөй айылындагы госпиталда 4 адам текшерилүүдө. Абалдары — канааттандырарлык. Калган 189 адам штабдын чечими менен жашаган жеринен медициналык кароодон өтүү үчүн коё берилген.
Вирустун алдын алуу чаралары:
- Колду самындап бат-бат жууп туруу же спирт менен сүртүү;
- Жөтөлгөндө же чүчкүргөндө оозду, мурунду чыканак менен же бир жолу колдонулуучу кагаз бет аарчы менен жабуу;
- Сасык тумоо же курч респиратордук инфекциялардын белгилери байкалган адамдардан алыс болуу;
- Эт жана жумурканы жакшылап бышырып колдонуу;
- Жаратылыштагы жапайы жаныбарлар жана канаттууларга жакындабаш керек;
- Эгерде дене табыңыз көтөрүлүп, жөтөлүп, дем алууңуз кыйындаса, тезинен медициналык жардам алууга кайрылыӊыз.